Құрметті тұрғындар!

"Жарқайың ауданы әкімдігінің халықты жұмыспен қамту орталығы" КММ Кәсіпкерлікті дамыту жөніндегі 2021-2025 жылдарға арналған ұлттық жоба шеңберінде Skills Enbek платформасында сұранысқа ие дағдылар бойынша курстардың мазмұны кеңейтілгенін хабарлайды ((https://skills.enbek.kz/)). Бұл онлайн курстар барлық азаматтарға қол жетімді. Соның ішінде, жұмыссыздарға мансапты дамыту немесе өзгерту үшін ақысыз негізде оқуға, еңбек нарығында бәсекеге қабілеттілігін арттыру үшін өз дағдыларыңыздың деңгейін арттыруға болады.

Биылғы оқу жылында  «Балдырған» бөбекжайымызда ата-аналардың сұранысымен  мектепалды даярлық тобы ашылған еді. Білім беру үрдісіндегі жаңа бағдарламаға сай мектеп жасына дейінгі балаларға  сапалы білім мен  саналы тәрбиені қызықты да танымды ойындар ойнату арқылы жүзеге асырып келеміз. Бала тәрбиесі қашанда қиын, жауапты міндет. Ұрпақ тәрбиесі қоғамнан тыс, оқшау тұрған емес. Ол қоғамның, заманның бағыт-бағдарымен, тыныс-тіршілігімен бірге жүріп отырады. Сондықтан да біздің де бөбекжайымызда  жаңа бағдарламаға сай оқу іс-әрекеттері ойын түрінде өтеді. Ал бүгінгідей динамика ғасырында оқу процесінде ойын алдыңғы орында тұрғандықтан, яғни ойын технологиясы арқылы баланың білімге деген ынтасын, қызығушылығын арттыра аламыз. Түрлі дидактикалық ойындар арқылы балалардың ақыл-ойын дамытып, сабаққа деген қызығушылықтарын арттырамыз. Бөбекжайымызда мектепалды даярлық тобы болғандықтан, сауат ашу негіздерінде дыбыстармен танысып, әріптер сырын ұғып келеміз. Осы мақсатта  бөбекжайымыз арнайы тапсырыспен қазақ тіліндегі үлкен текше-әріптер жинағын алғызып, балаларға қуаныш сыйлады. Бұл түрлі-түсті текшелермен ойын арқылы дыбыстарды дұрыс айта білуге, әріптерді тани білуге үйрететін боламыз. Осы орайда біз бөбекжайымыздың меңгерушісі Г.С.Серікбаеваға шексіз алғысымызды білдіргіміз келеді.                                                                                                                      

МКҚК «Балдырған» бөбекжайы»  тәрбиешісі  Ж. Балдаева.

Қаламыздың орталығындағы "Автобөлшектер" дүкенінің иесі Андрей Ивахненконы аудан азаматтары жақсы танитыны жасырын емес. Себебі, көлігінен ақау тапқан жүргізушілер бірден қажетті керек жарағын осы дүкеннен тауып жатады. Әрі, мұнда тапсырыста береді. Біздің айтпақ ойымыз дүкен жайлы емес. Нақтырақ айтсақ, Андрей Валерьевич жайлы болмақ. Оның қазақ тілінде таза сөйлейтінін бірі білсе, бірі білмес. "Бүгінде, күн өткен сайын, қазақ тілін білуімнің қажеттілігі артып келе жатыр" - дейді ол, өз сөзінде. Өйткені, қазақ тілді азаматтар көбінде орысшаға тілі бұратылып, қажетті құралдарын сатып алу үшін ұялып болсада сұрап жатады екен. Сол уақытта "қазақша айта беріңіз" дегенде, әлгіндегі сатып алушылар қуанып, әрі таңырқап қалатын көрінеді.

Қостанай облысы, Әулиекөл ауданына қарасты Қаймақкөл ауылында туып өскен А.В. Ивахненко қазақша сөйлеуді бала кезінде әуелі әжесінен, кейін, құлын-тайдай тебісіп, бала кез, балғын шағын бірге өткізген, қазақ достарынан үйреніпті. Оның сөзінше Надежда әжей үйіне келген қонақтармен шүйіркелесіп, ескінің естеліктерін, көненің әңгімелерін қазақ тілінде емін-еркін айтатын көрінеді. Бұл күні, Андрей Валерьевич екі ұлына қазақ тілін үйретіп жүр. Соның бірі, осы дүкеннің екінші бөлігінде көлік қажеттіліктерін сататын Артем Андреевич. Ол таза қазақша сөйлемесе де, көп сөзді, қазақша жазуларды түсінемін дейді.

"Тіл үйрену ешқашан кеше емес. Сол себепті, біл білме, әйтеуір былдырлап, тілің күрмеліп болсын сөйлей бер, түбінде кез-келген тілді үйреніп аласын - дейді, А.В. Ивахненко

- Қазіргі күні кәсіпкерлерге қазақ тілін тез үйрену үшін бүкіл жұмысты тастап, арнайы оқу орталықтарына барып, ұзақ уақыт дайындалу керек. Ал, бүгінде бәсекелестік дамып, ақшаны қалай тапсам екен деген уақытта көпшілігінің қолы тие бермейді- деп, Андрей Валерьевич ағынан жарылды.

Расымен де, тіл үйренем деген адам, ешкімнен қорықпай, білгенінше сөйлей берсе, қай тіл болмасын үйреніп алары хақ. Ал, мемлекеттік тілді біл, әр азаматтың Отан алдындағы борышы, әрі алдағы уақытта нан табу құралы болмақ. Олай дейтініміз, Тәуелсіздігімізді алған 32 жыл уақыт ішінде қазақ тіліне деген қажеттілік уақыт өткен сайын артып келе жатыр. Әрі, мемлекеттік тілде сөйлейтін өзге ұлт өкілдерінің саны өссе кеміген емес. Оған бүгінгі кейіпкеріміз Андрей Валерьевичпен оның ұлы Артем дәлел.

Кез-келген мекемеде, сауда орталықтарында қызметті мемлекеттік тілде де, ресми тілде де теңдей көрсететін болса, әрине, бұл мекемеге, сауда нүктелеріне жүгінетін азамттардың қарасы көбейіп, ісі алға домалары анық. Сол себепті, болашақты бүгіннен ойланайық...

"Жарқайың тынысы" газетінің тілшісі,  Халықаралық "Қазақ тілі қоғамы"  ҚБ, Жарқайың аудандық филиалының төрағасы О.Зейнолла.

12  қаңтар күні аудан Мәдениет үйінің ғимаратында "АМАНАТ" партиясы Жарқайың аумақтық филиалының кезектен тыс 41 конференциясы өтті. Конференция жұмысына "АМАНАТ" партиясы Ақмола өңірлік филиалының қоғамдық қабылдау бөлімінің меңгерушісі және бастауыш партия бірлестіктерінің делегаттары қатысты.  Конференция барысында "AMANAT" Партиясының Жарқайың аумақтық филиалының 2022 жылғы жұмысының қорытындысы туралы партияның аумақтық филиалының Атқарушы хатшысы Гүлжан  Баегизова сөз сөйледі

Жиында "AMANAT" Партиясының Жарқайың аумақтық филиалының 2022 жылғы жұмысының қорытындысы бірауыздан қанағаттанарлық деп танылды.

"AMANAT" партиясының орталық аппаратымен келісім бойынша "AMANAT" Партиясының Жарқайың аумақтық филиалының төрағасы лауазымына партияның аумақтық филиалының Атқарушы хатшысы Баегизова Гүлжан Маркенқызын сайлау туралы ұсынысты конференция делегаттары қолдады. Қазақстан Республикасының кейбір заңнамалық актілеріне Мемлекет басшысының 2022 жылғы 16 наурыздағы Жолдауын іске асыру мәселелері бойынша өзгерістер мен толықтырулар енгізілуіне байланысты "AMANAT"Партиясының Жарқайың аумақтық филиалының Саяси кеңесінің құрамына өзгерістер енгізу туралы ұйымдастыру мәселесі қаралды. Конференция барысында "AMANAT" партиясының мүшесі Асылбек Арыстанбеков "AMANAT" партиясынан Ақмола облысы Жарқайың ауданы Үшқарасу ауылының әкіміне ұсынылды. Конференция соңында "AMANAT" Партиясының Жарқайың аумақтық филиалы Саяси кеңесі Бюросының отырысы өтті.

"Жарқайың тынысы" газетінің тілшісі  О.Зейнолла.

16 қаңтарда Жетінші шақырылған Жарқайың аудандық мәслихатының кезектен тыс қырық үшінші сессиясы өтті.

Сессия жұмысына аудан әкімі Ж. Хамитов, мемлекеттік органдардың басшылары, сондай-ақ бұқаралық ақпарат құралдарының өкілдері қатысты.

Сессияға аудандық мәслихат депутаты А.Әлжанов төрағалық етті.

Аудандық мәслихат сессиясының күн тәртібінде Жарқайың аудандық мәслихатының 2021 жылғы 15 қаңтардағы № 7С-1/5 «Аудандық мәслихаттың жетінші шақырылымының хатшысын сайлау туралы» шешіміне өзгерістер енгізу, «аудандық мәслихаттың 2019 жылғы 11 қаңтардағы №6С-35/3 «Жарқайың аудандық аумақтық сайлау комиссиясын сайлау», «Жарқайың аудандық мәслихаттың депутаттарын сайлау бойынша округтік сайлау комиссияларын сайлау», «аудандық мәслихаттың 2019 жылғы 11 қңтардағы №6С-35/4 «Учаскелік сайлау комиссияларын сайлау туралы» шешіміне өзгерістер енгізу, «Жарқайың ауданының басқару схемасын бекіту туралы», Жарқайың аудандық мәслихатының 2022 жылғы 20 мамырдағы №7С-31/3 «Жарқайың ауданы әкімдігінің жанындағы жер комиссиясы ережесін және құрамын бекіту туралы» шешіміне өзгерістер енгізу, Жарқайың аудандық мәслихатының 2021 жылғы 8 шілдедегі №7С-11/4 «Жарқайың ауданы әкімдігінің жанындағы тұрғын үй комиссиясының құрамын бекіту туралы» шешіміне өзгеріс енгізу, Ақмола облысы Жарқайың ауданы Костычево ауылдық округі Костычево ауылын Ақмола облысы Жарқайың ауданы Костычево ауылдық округі Сарыарқа ауылына қайта атау бойынша ұсыныс енгізу туралы  мәселелер қаралды.

Қаралған мәселелер бойынша ақпараттар тыңдалып, тиісті шешімдер қабылданды.

"Жарқайың тынысы" газетінің тілшісі.