1 ақпанында Ақмола облыстық мәслихатының төрағасы Бейбіт Жүсіпов жұмыс сапарымен Жарқайың ауданына барды.

Облыстық мәслихат төрағасы Бейбіт Жүсіповтың 8-ші шақырылған Жарқайың аудандық мәслихатының депутаттарымен кездесуі облыстық депутат Марат Қойшыбаевтың, облыстық мәслихат аппараты басшысының орынбасары Жанна Искакованың қатысуымен, сондай - ақ өткен шақырылымдардың бұрынғы депутаттарының қатысуымен өтті. Әріптестерімен айтарлықтай кеңейген өкілеттіктер тізімін, депутаттық қызметті жандандыру жөніндегі ұсыныстарды талқылай отырып, олар халықтан келіп түсетін ең өзекті мәселелерді шешу үшін бірлескен іс-қимыл жоспарларын нақтылады.

Кездесу соңында Ақмола облыстық мәслихатының төрағасы Қазақстан Республикасы мәслихаттарының құрылғанына 30 жыл толуына орай ауданның депутаттық корпусының ардагерлері Виталий Камышанский мен Николай Семкинге алғыс хаттар табыс етті.

Жұмыс сапарының соңында депутаттар Пригородное ауылындағы Абай атындағы мектепке барып, мектептің жай-күйімен танысты. Ағымдағы жылы бюджеттен мектептін шатырын жөндеуге қаражат бөлінді. Енді мектепті толық көлемде жөндеу үшін білім бөлімі қаражат сұрады. Себебі білім ордасының екінші қабаты  жыларман болып, әрі қабырға төбелерінен су аққан іздері тұр. Тіпті ақбалшығы құлап, су тиген орындар көгерген. Балалар әзірге 1 қабатта оқып жатыр. Аталмыш мектеп 1977 жылы салынған. Содан бері жөндеу көрмеген, тек осыдан 10 жыл бұрын төбесі ауыстырылыпты. Оның өзінде сапасыз жасалған дейді. Мектепте 87 бала білім алуда. Мектепті толық жөндеуге қанша қаражат кетері белгісіз. Алайда құр жобалық сметалық құжаттарды дайындауға 3-4 млн. шамасында қаржы керек деп отыр. Бейбіт Жүсіпов мектепті толық аралап, ғимараттың мүшкіл халімен танысты. Жылу жүйесіне де көңілі толмайтынын мойындады. Сол үшін мектеп директорына от жағатын қызметкерлерді қадағалап, қазандықтан шығатын қызу температурасын бақылап отыруды тапсырды.

"Жарқайың тынысы" газетінің редакторы О.Зейнолла.

Жарқайың ауданының әкімі Жанболат Хамитовтың 2024 жылғы 1 ақпандағы №16 өкімімен Ауыл шаруашылығы, жер қатынастары және кәсіпкерлік бөлімінің басшысы болып Еркін Орынбайұлы Әубәкіров тағайындалды.

1 ақпанда аудан әкімі, Еркін Әубәкіровті ауыл шаруашылығы, жер қатынастары және кәсіпкерлік бөлімінің ұжымына таныстырды.

Еркін Әубәкіров 1982 жылы 9 қазанда Державин қаласында дүниеге келген. Жоғары білімі бар, 2005 жылы Алматы Экономика және статистика академиясын Бухгалтерлік есеп және аудит мамандығы бойынша бітірген. Еңбек жолын 2002 жылы Пятигорское ауылындағы шаруа қожалығында бухгалтер болып бастаған. Соңғы жұмыс орны Пригородное ауылының әкімі. Мемлекеттік қызметтегі еңбек өтілі 20 жылдан астам.

Жарқайың ауданы әкімінің баспасөз қызметі.

Аудандық білім бөлімінің жоспары бойынша Жарқайың ауданы мектептерінің әдіскерлерімен кездесу өтті. Жиынға аудандық білім бөлімінің басшысы Гүлшат Нұрпейсова қатысып, ұстаздарға бүгінгі заман талабына сай білім берудегі педагогтің рөлін түсіндірді.   

Гүлжан Исаева «Мектептің оқу-тәрбие жұмысының жылдық жоспары құрылымына өзгерістер енгізу арқылы оқу-тәрбие жұмысын жаңа бағытта ұйымдастыру» тақырыбында шеберлік сағатын өткізді.  Өзін-өзі жүзеге асыруға, кәсіби құзыреттілікке, нәтижелілікке, үш бағыт бойынша қол жеткізуге ықпал ететін педагогтердің кәсіби дамуында ынталандыру рөлін атқаратын Әдіскерлік бөлім әдіскер-басшысының жұмысы туралы айтып берді:

- тәрбиеленушілердің білім сапасын арттыру;

- педагогтарды оқыту сапасын арттыру;

- педагогтерді аттестаттау.

Жұмыс барысында мектептердің ӘБ басшылары өз тәжірибелерімен бөлісті, үш бағыт бойынша туындаған қиындықтарды жеңу үшін жұмысты қалай жақсартуға болатыны туралы әңгімеледі.

Аудандық білім бөлімінен жұмыста орындау үшін ұсыныстар берілді. Мектеп әдіскерлері мен ұстаздарының  барлық тілектері ескерілді. Кездесу қызықты, танымдық қасиеттерге толы және жемісті өтті.

"Жарқайың тынысы" газетінің редакторы О.Зейнолла.

25 қаңтарда Жарқайың аудандық мәслихатының төрағасы А. Әлжановтың төрағалығымен сегізінші шақырылған Жарқайың аудандық мәслихатының кезектен тыс 22 сессиясы өтті.

Сессия жұмысына Ақмола облыстық мәслихатының депутаты В. Камышанский, аудан әкімінің орынбасары М. Жекебатырова, бұқаралық ақпарат құралдарының өкілдері және шақырылғандар қатысты.
Күн тәртібінде 1.Жарқайың аудандық мәслихатының 2023 жылғы 23 маусымдағы № 8С-7/4 «Жарқайың ауданы әкімдігінің жанындағы жер комиссиясы ережесін және құрамын бекіту туралы» шешіміне өзгерістер енгізу туралы мәселе қаралды. Бұл туралы бөлімнің басшысының уақытша міндетін атқарушы Тоқтар Шпанов баяндады.

Сессияда бұдан бөлек  Жарқайың аудандық мәслихатының 2021 жылғы 8 шілдедегі № 7С-11/4 «Жарқайың ауданы әкімдігінің жанындағы тұрғын үй комиссиясының құрамын бекіту туралы» шешіміне өзгеріс енгізу туралы айтылды.

Қаралған мәселелер бойынша депутаттары дауыс беріп, тиісті шешімдер қабылдады.

"Жарқайың тынысы" газетінің редакторы О.Зейнолла.

Жарқайың ауданының әкімі Жанболат Хамитов, Ерлан Алин басшылық ететін «Темірлан» жауапкершілігі шектеулі серіктестігінің, «800 бас ІҚМ сауын залы бар сүт фермасын салу» жобасының құрылыс барысымен танысты.

Жобаның жалпы құны-1,3 млрд. теңге. 2023 жылы 700 млн.теңге меншікті қаражатты игере отырып, 400 бас ірі қара малға арналған ферма құрылысы жүргізілді. Сүтті қабылдау және өңдеу үшін жабдықтар сатып алынып 2023 жылдың маусым айында нысан аумағына жеткізілді.

Осы жобаны іске асырумен 10-нан астам жаңа жұмыс орны құрылады. Нысанды ағымдағы жылы аяқтау жоспарлануда.

Жарқайың ауданы әкімінің баспасөз қызметі.