Қаржылық алаяқтар азаматтарды өз схемаларына белсенді түрде тартуды жалғастыруда. «Алаяқтық» бабы бойынша Қазақстанда 2022 жылдың басынан бастап бес ай ішінде 17,8 мыңнан астам қылмыстық іс тіркелді, оның ішінде интернет-алаяқтық бойынша – 8 мыңнан астам, төлем карталарын пайдалана отырып – 127. Бұл 2022 жылғы қаңтар-сәуір айларындағы 13,8 мыңнан астам қылмыстық іс тіркелген кезеңге қарағанда 20%-ға артық, оның ішінде интернет-алаяқтық бойынша – 6 мыңға жуық, төлем карталарын пайдалана отырып – 97.

Fingramota.kz зардап шеккендердің қатарын толтырмау үшін онлайн және офлайн қауіпсіздік ережелерін сақтаудың маңыздылығын еске салады.

Алаяқтардың жаңа схемалары – бұл алдаудың жетілдірілген ескі тәсілдері. Зиянкестердің басты мақсаты азаматтардың дербес деректеріне және олардың банктік шоттарына қол жеткізу болып табылады.

Қазіргі заманғы алаяқтар әлеуметтік инженерия әдістерін қолданады, яғни әртүрлі психологиялық және әлеуметтанушылық әдістер, айла-шарғылар және IT-технологиялар арқылы өз құрбандарына шабуыл жасайды. Нәтижесінде адам әлеуметтік инженерлерге барлық қажетті ақпаратты: төлем карталарының деректемелерін, электрондық поштаның құпия сөздерін, мобильдік банкингтегі жеке кабинетті және басқа да құпия ақпаратты өз еркімен береді.

№1 схема. «Қиялдағы жобаға» салынған» инвестициялар

Бұл онлайн-жоба түрінде ұсынылған және жаңа қатысушыларды тарту міндетті емес қаржы пирамидасының бір түрі. Мұндай пирамиданың өмір циклі өте қысқа және бұл оның классикалық пирамидадан айырмашылығы. Мысалы, желіде сізге жоғары кірісті жобаға инвестиция салу ұсынылады және олардан өте жоғары кіріс алуды уәде етіп, аз мөлшерде салым салуды сұрайды. Алайда, ұйымдастырушылар айтарлықтай соманы жинағаннан кейін жобаны жауып, жоғалып кетеді. Қаскүнемдер қаржылық шығын аз болған себепті алданған адамдар құқық қорғау органдарына жүгінбейді деп үміттенеді. Көбінесе солай болып жатады, сондықтан пирамида жасаушылар сол схема бойынша жаңа жоба ашады, бірақ басқа атаумен, осылайша бәрі қайталанып отырады.

«Қиялдағы жоба» – бұл, шын мәнінде, қаржы пирамидасы, оны ұстап тұру үшін ақша мен жаңа сатып алушылардың тұрақты ағыны қажет. Қаражат көзі таусылған кезде пирамида құлайды.

Тез жұмыс табу үшін көбінесе жастар, әсіресе студенттер қаржы пирамидаларын ұйымдастырушылардың айла-амалдарына түседі. Өкінішке орай, олар барлық ақшаны қаржы пирамидаларына салады, кейде кредит рәсімдеп, туыстары мен достарынан ақша алады. Нәтижесінде олар сан соғып, алданып қалады.

Абай болып, қырағылық танытыңыз! Мұндай қаржы пирамидаларының құрбаны болмас үшін олардың негізгі белгілерін танып-білу қажет:

• қысқа мерзімге салған ақша қаражатынан да көбірек пайда табу туралы «қарық қылып» уәде беру;
• жинақтаушы бағдарламаға ақша жарнасын салуды талап ету;
• «жеке менеджердің» банк картасына қаражат аудару туралы өтініш;
• лицензия немесе оның болмауы туралы ақпаратты беруден бас тарту;

5) компания сайтында меншік иесі туралы мәліметтердің, заңды мекенжайы мен байланыс деректерінің болмауы; интернетте компания туралы пікірлердің болмауы;

6) әлеуметтік желілердегі агрессивті жарнама;

7) тәуліктің кез келген уақытында менеджердің жасырын нөмірден немесе әр түрлі нөмірлерден қоңырау соғуы.

Есіңізде болсын: Қазақстанда өз қызметін жүзеге асыратын барлық қаржы ұйымдары ҚР Қаржы нарығын реттеу және дамыту агенттігінің бақылауында және тиісті лицензиясы бар. Оның болуын қаржылық реттеушінің сайтында тексеруге болады www.gov.kz.

Біздің кеңес: сіз толық білмейтін құралдарға ақша салу арқылы салған ақшаңыздан да көбірек ақша табасыз дегенге сенбеңіз. Пирамида жасаушылар  кәсіби әлеуметтік инженерлер және олардың интернет-жобаларына ақша  салғаннан кейін әдемі, бай өмір сүресіз деген уәдесі бірден көзден ғайып болады. Ешқашан қандай да бір жобаларға ақша салу үшін кредит алмаңыз!

№2 схема. Оңай және жылдам ақша табуға арналған онлайн-платформалар

Фишинг – әлеуметтік инженерлердің сүйікті құралы. Егер бұрын қасүнемдер жай ғана фишингтік сайттарға сілтемелерді электрондық пошта немесе SMS арқылы жіберетін болса, бүгінде олар пайдаланушыларды фишингтік сайттарға әкелетін әлеуметтік желілерде жалған аккаунттар ашады.

Мысалы, алматы телеарнасының аккаунты түрінде қаскүнемдер Илон Маск құрған Tesla компаниясының платформасы туралы «жаңалықтық» сюжет таратады, ол «биржада «акциялар мен алтын валюталарды саудалайды» деген болжам жасайды. Бұл қор нарығындағы автоматты сауда роботы. Тұрақты негізде тұрақты және пассивті кіріс алғысы келетіндер тек платформада тіркеліп, оқуға жарты сағат уақыт жұмсап, инвестиция сала бастауы керек. Платформаны құрушылардың айтуынша, қаражатты алу тіркеуден кейінгі келесі күні, 24/7 режимінде, Қазақстанның кез келген картасына қолжетімді және 5-тен 10 минутқа дейін уақыт алады. Алайда компания қызмет көрсеткені үшін шығарылған қаражат сомасының  1,5% алады.

Осы платформа туралы постың астында өз пайдасын көрсетіп, осы платформаға ақша салуға шақыратын, ризашылық білдірген инвесторлардың жалған пікірлері жарияланды.

Тағы бір мысал – KAZ Minerals, Қазақмыс, ҚазМұнайГаз компанияларының бірегей инвестициялық жобалары, олар туралы ақпаратты алаяқтар танымал әлеуметтік желілерде таратады. Алаяқтар пайдаланушыларға 53 мың теңге бастапқы инвестициямен 4 апта ішінде жалпы кірісі 890 мың теңге дейін кіріспен, мұнай-газ және мыс өндіретін компаниялардың командасына қосылуды ұсынады. Платформаға кіру үшін фишингтік сайтта сауалнамадан өту қажет, онда өз деректеріңізді: аты-жөніңізді, электрондық мекенжайыңызды және телефон нөміріңізді қалдыру қажет. Әлеуметтік инженерлерге ұзақ уақыт ойланудың пайдасы жоқ, сондықтан олар өз жазбаларында платформаға тіркелу жақында аяқталады деп хабарлайды.

Мұқият және сергек болыңыз! Tesla – бұл Илон Масктың автокөлік компаниясы, ол өздігінен басқарылатын электр машиналарын жасайды. Бірақ биржада инвестициялауға арналған платформа емес. Және қазақстандық корпорациялар өздерінің инвестициялық плаформаларына қол жеткізу үшін бөгде интернет-ресурстарда сауалнама жүргізбейді. Алаяқтар мүмкіндігінше көп «клиент» тарту үшін танымал ұйымдардың атын жамылады.

Мұқият пайдаланушылар, посттар мен фишингтік сайттарда атынан алақтар әрекет ететін компаниялардың логотиптері қолданылғанымен, онда көптеген грамматикалық қателер бар екенін байқайды. Қалай болса солай жасалған дизайн мен оғаш URL-мекенжайы да көзге түсіп тұрады.

Егер сіз алаяқтарға сеніп, инвестициялық шотыңызды «толтыру» үшін оларға ақша тастасаңыз, онда сіздің қаражатыңызды сізге ешкім қайтармайды. Алаяқтар әлеуметтік инженерия әдістерін қолданып, бастапқы кезде сіздің сәтті салымдардан болған күнделікті кірісіңіздің «өсуі» бар суретті жібереді. Бірақ іс жүзінде қор нарығында ешқандай сауда болмайды.

Егер желіде сізге инвестицияның 99% қайтарымы бар қор нарығында оңай табыс ұсынылса немесе өз капиталыңызды қысқа мерзімде көбейтуге мүмкіндік беретін керемет платформаларға қол жеткізу үшін сауалнама жүргізуді сұраса, сенбеңіз.

Біздің кеңес: Сайттың атауына ерекше назар аударыңыз және өз дербес деректеріңізді еш жерде қалдырмаңыз!

№3 схема. Телефон арқылы жасалатын алаяқтық

Әлеуметтік инженерлер телефон арқылы сөйлескен кезде, әдетте адамдар олардан алдауды күтпейтін: банктердің, Қазақстан Ұлттық Банкінің, құқық қорғау органдарының, Экономикалық тергеу департаментінің, салық және коммуналдық қызметтердің қызметкерлері ретінде өздерін таныстырады.

Алаяқтар телефон нөмірлерін ауыстырудың түрлі қызметтерін, мысалы, Қазақстанның қаржы институттарының абоненттік нөмірлерін қайталауға мүмкіндік беретін SIP-телефонияны пайдаланады, сондықтан олар кез келген банктің колл-орталығының төрт таңбалы нөмірін де оңай қолдан жасай алады.

Мысалы, қаскүнемдер зейнеткерлерге қоңырау шалып, өздерін банк қызметкерлері ретінде таныстырып, олардың картасынан біреу ақша шығаруға әрекет жасағанын және бұған жол бермеу үшін клиент қаражатты дереу қауіпсіз шотқа аударуы керек деп хабарлауы мүмкін.

Содан кейін олар қарт адамның интернетті немесе мобильдік банкингті қолдана алатындығын анықтап, ақшаны қашықтан қалай аудару керектігі туралы нұсқаулар береді, телефонға белгілі бір қосымшаны жүктеуді ұсынады немесе банкомат арқылы тез арада ақша аударуға кеңес береді. Бұл ретте алаяқтар асықтырып, эмоционалды түрде қысым көрсетеді.

Алаяқтардың жаңа әдісі таралды. Қоңырау банктің қауіпсіздік қызметінен түседі және «маман» телефон нөмірін растауды ұсынады. Бұл ретте ол ауыстырылған нөмірлерді пайдаланатын телефон алаяқтарының белсенді әрекеттеріне сілтеме жасайды. Егер абонент келіссе, ол SMS-хабарлама арқылы телефонға жіберілген кодты айтуды сұрайтын роботқа ауыстырылады. Содан кейін абоненттің картасынан ақша есептен шығарылады, өйткені ол алаяқтарға конфиденциалды ақпаратты, оның ішінде карта бойынша операцияны растаудың SMS-кодын өз еркімен берді. Бас тартқан жағдайда, көнбейтін клиентке басқа ауыстырылған нөмірлерден қауіпсіздік қызметкерімен неге тілдесуді тоқтатты деген сұрақпен қоңыраулар түседі немесе аватар ретінде банктің логотипін қолдана отырып, Telegram-ға жазады. Әлеуметтік инженерлер өте табанды, олар мақсаттарына жеткенше өз құрбандарына шабуыл жасайды.

Алаяқтардың тағы бір схемасы  «қате» аударыммен байланысты. Сіздің шотыңызға шынымен N сома қаражат түседі. Содан кейін адам қоңырау шалып, ол сізге түскен соманы байқаусызда аударғанын хабарлап, оны қайтаруды сұрайды. Кейде алаяқтар мазалағандары және жауапкершілік үшін сыйақы ретінде белгілі бір соманы қалдыруды ұсынады. Сонымен қатар, әлеуметтік инженерлер өте сенімді, олар асықтырып, ойлануға уақыт бермей, қысым жасайды. Көп адамдар алаяқтардың әңгімелеріне сеніп, ақша аударады. Алайда, кейін Сіздің атыңызға біреу ғана емес бірнеше кредит  берілгені белгілі болды. Сіз бұл ақшаны өзіңіз алып, аударғандықтан, бұл кредитті алуды растайды.

Абайлаңыз және сақ болыңыз! Телефон арқылы әрекет ететін алаяқтар сізді сендіру үшін қолдан келгеннің бәрін жасайды. Ең алдымен, әңгімені тоқтату және сізге оның атынан қоңырау соғып тұрған ұйымға өзіңіз қоңырау соғуыңыз керек. Бұл ретте осы ұйымның ресми интернет-ресурсында көрсетілген нөмірді қолмен теру қажет. Егер сізге қызмет көрсететін банктің атынан хабарласқан  болса, оның байланыс нөмірін карточканың сыртқы жағынан табуға болады.

Егер сіз мемлекеттік тілді білетін болсаңыз, сізге қоңырау соғып тұрған адамның алаяқ не алаяқ емес екендігін тексеру үшін онымен мемлекеттік тілде сөйлесуге болады. Бір-екі маңызды сөз тіркестерін жаттап алып, телефонмен әңгіме барысында қолданып көріңіз.

Ешбір жағдайда қоңырау соғатын адамдардың нұсқауларын орындамаңыз: ақша аудармаңыз, күмәнді қосымшалар орнатпаңыз және қоңырау соғушының талаптары бойынша SMS-кодтарды жарияламаңыз. Шотыңызға сіз күтпеген ақша түскен жағдайда, өзіңізге қызмет көрсететін банкке хабарласыңыз және ақшаны жөнелтушіге қайтару арқылы аударымның күшін жоюды өтініңіз.

Біздің кеңесіміз: Ақша туралы сөз қозғайтын бейтаныс адамдарға сенбеңіз! Өзіңіздің дербес деректеріңізді, карточкаңыздың деректемелерін: CVC/CVV-кодты (төлем картасының артқы жағындағы үш мәнді код), ПИН-кодты, қолданыс мерзімін ешкімге айтпаңыз. Есіңізде болсын: банк қызметкерлері, банктердің байланыс орталықтарының операторлары еш уақытта бұл ақпаратты телефон арқылы сұрамайды!

          №4 схема. Алаяқтардан онлайн-ойындар

Қазіргі балалар алданып қалуы мүмкін көптеген қаржылық алаяқтықтар әдетте мобильдік не компьютерлік ойындарды сатып алу кезінде орын алуы мүмкін. Көптеген онлайн-ойындарда пайдаланушыларға жабдық, ең жоғары деңгейге жету үшін «мықты» бонустар сатып алу не қандай да бір жаңа локацияларды бұғаттан алу ұсынылады. 

Ойынға қажетті белгілі бір заттарды жеңілдікпен сатып алу немесе ақылы ойынды жарнамасыз арзан бағада сатып алу туралы ұсыныс барынша қызықтырады. Алайда, мұндай сауданың барлығы бірдей қауіпсіз емес. Осылайша қаскүнемдер зиянды қосымшаларды таратуы мүмкін. Және белгісіз дереккөзден «жеңілдікті» ойынның орнына бала жеке деректерді, оның ішінде геодеректерді жинайтын вирустық бағдарламаны жүктеп алуы ықтимал. Яғни, алаяқтар сіздің қайда тұрып, қайда жұмыс істейтініңізді, балаңыздың қайда оқитынын, уақытыңыздың көп бөлігін қайда өткізіп, қайда демалатыныңызды оңай анықтай алады, әдетте бұл онлайн сауда жасаған кезде болатын жағдай және т.б. Осылай, қаскүнемдер үшін сіздің неге қызығушылық танытатыныңызды әрі балаларыңыздың немен әуестенетінін біліп алу қиынға соқпайды. Ал кейбір қосымшалар арқылы кибералаяқтар тіпті пошталық сервистерге, әлеуметтік желілерге кіру мүмкіндігін пайдаланады, ал бұл өте қауіпті, себебі әлеуметтік инженерлер сіздің банк карталарыңыз бен шоттарыңыз жайында мәліметтер алуы мүмкін.

Сақ әрі абай болыңыз!  Балаларыңызға банк карталары, әсіресе жалақы картасы тіркелген немесе басқа маңызды ақпарат сақталған телефоныңызды бермеңіз. Сонымен бірге, телефон арқылы сауда жасауға шектеулер орнатып, балаларыңыз абайсызда ресімдеуі мүмкін ақылы жазылымдарды үнемі тексеріп отыру қажет.

Ата-анасы карта ресімдеген әрі өз гаджеті бар ересек балаларға күмән тудыратын лицензияланбаған қосымшаларды жүктеудің салдары жайында түсіндіру қажет. Әйтсе де, егер балаңызбен бірлесіп, онлайн-сауда жасауды жөн санасаңыз, онда ол үшін виртуалды картаны пайдаланып, оған жұмсағыңыз келген соманы ғана салған дұрыс.

         Біздің кеңес: Онлайн-сауданың барлығын жалақы картасына қоса тіркелмеген бөлек төлем картасының көмегімен әрі тек тексерілген сайттарда ғана жасаңыз. Қосымшаларды өз гаджеттеріңізге тек ресми дүкендер арқылы жүктеңіз. Электрондық поштаңызға жіберілген белгісіз файлдарды және мессенджерлерді ашпаңыз. Вирусқа қарсы лицензиялық бағдарламалық қамтылымды интернет-банкинг сервистерін қосатын құрылғыларға пайдаланыңыз.

Әлеуметтік инженерлермен сөйлесу кезінде ақшаңызды жоғалтып алудан сақтайтын бірден-бір тәсіл – ақшаға байланысты, мейлі, лотереяда ұтып алу, оңай олжа немесе тиімді инвестициялар болсын, кез келген ұсынысқа сын көзбен қарау, қаржыға байланысты ақпаратты қайта тексеріп шығу әрі маңызды шешімдер қабылдау кезінде асығыстық танытпаған жөн. Өзіңізді әрі ақшаңызды қаржылық алаяқтардан қорғау үшін, сандық гигиенаны сақтап, біздің кеңестерімізді орындауды ұмытпаңыз.

Fingramota.kz сайтымен бірге қаржылық сауаттылығыңызды арттырыңыз!

Мұсылман халықтарының ең басты ұлық мейрамы Құрбан Айт мерекесі басталуда.

Үш күнге созылатын мейрам жыл сайын хижра - мұсылман күнтізбесі бойынша Зүлхижа айының оныншы жұлдызында (Арафа күнінен кейін) және Ораза айт мейрамынан 70 күн өткеннен кейін басталады. Құрбан Айтта мұсылман жұрты құрбандыққа мал сойып, думанды мейрам жасап, үлкен-кіші арасында үгiт-насихат, өсиеттер айтып, бір-біріне құрмет көрсетеді.

Осы орайда NDH порталы барша мұсылман қауымын және қазақстандықтарды Құрбан Айт мерекесімен құттықтап, қасиетті мейрамның шығу тарихы және әр мұсылман елдерінде тойлану хақында қызықты деректерді ұсынады. 

-    Құрбан айт күні мұсылман баласы ерте тұрып, таза киімдерін киіп, хош иіс әтірлерін сеуіп, мешітке барады. Ағайын-туыс, көрші-қолаң бір-бірінің үйіне айттап қыдырады. Айттың алдында тәтті тағамдар мен  шелпек, бауырсақ пісіріледі.

-   Елбасының ұлттық мерекелердің мәртебесін көтеру бастамасының арқасында  Құрбан Айт мемлекеттік деңгейде аталып өтілетін болды. 2005 жылғы 28 желтоқсанда Мәжілістің жалпы отырысында депутаттар «Қазақстан Республикасындағы еңбек туралы» ҚР Заңына толықтырулар енгізу туралы» заң жобасын қабылдап, соған сәйкес Құрбан айт пен Рождество мерекесінің бірінші күні елімізде демалыс күндері болып жарияланды.

-   Қазақтардың алғаш Құрбан Айтты тойлаулары туралы ақпараттар ХІХ ғасырдағы орыс жазбаларында да кездеседі. Тарихи құжаттарға жүгінетін болсақ, қазақ жерінде 1926 жылға дейін Ораза айт 3 күн, Құрбан айт 3 күн, Наурыз 1 күн ресми мереке ретінде тойланып келген. Оған негіз 1921 жылғы 5 наурызда Орынбор қаласында өткен Қазақстан Автономиялы Республикасы Орталық атқару комитеті Төралқасының «Мұсылмандар мерекесі» туралы қабылдаған шешімі. Оған C.Меңдешев төрағалық жасаса, Алаш арыстары А.Байтұрсынұлы пен Ә.Бөкейхандар Төралқа мәжілісіне қатысқан екен.

-   Құрбан Айтты тойлау және құрбан шалу салты Орталық Азияда ислам дінінің келуімен бірге тараған. Ол Х-ХІІІ ғасырларда етек алған. Бұл салт көшпелі мал шаруашылығымен айналысатын халық үшін таңсық болмайды.

-   Құрбан Айт – мұсылмандардың ең қасиетті мерекесі. Ол «ораза айттан» кейін 70 күннен соң басталып, 3 күнге созылады. Бұл күндер Ұлы Меккеге қажылықпен аяқталады. Айт күндері Аллаһқа арнап құрбандық шалады, мал сояды (жылқыдан басқа). Бұл мұсылмандардың негізгі міндеттерінің бірі.

-   Мұсылман халықтары Ид аль-адха (Құрбан Айт) мейрамын әр түрлі тойлайды. Дегенмен, барлығына ортақ нәрсе Алланың разылығы үшін құрбандық шалу. Құранда былай делінген: «Аллаға құрбандықтың еті де, қаны да жетпейді, Аллаға сіздердің сенімдеріңіз ғана жетеді. Алла сіздерді тура жолға салушы, ал сен оны өзіңнің ізгі істеріңмен қуандыр!».

-   Әр мұсылман халықтарында Құрбан Айтты тойлаудың өзіндік ерекшеліктері бар. Мысалы, Мароккода, Индонезияда, Малайзияда Айт намазынан кейін адамдар көшеге шығып, ән айтып, би билейді екен. Бұл елдерде мейрам карнавал түрінде тойланады. Кешегі Кеңестер Одағының құрамында болған Эстония мұсылмандары да Құрбан айт мейрамын атап өтуге ерекше көңіл бөлген.  Эстония бұл мерекені мұсылмандар мен эстон қауымдастығының арасындағы қарым-қатынасты нығайтуға көмектеседі деп есептейді.

-   Марокко Корольдігі - Магрибтің ең ежелгі мемлекеттерінің бірі, ол араб әлемінің батыс бөлігін алып жатыр. Бұл елде де басқа елдердегідей құрбан шалу таң сәріден басталады. Барлық мұсылмандар сәнді киініп, айт намазына барады. Бұл елде мерекелік намазбен бірге қайырымдылық жасалады. Намаздан кейін мұсылмандар қайтыс болған адамдарды еске алу үшін зиратқа барады, содан кейін құрбандық шалуды бастайды. Марокканың мерекені атап өтудегі басты ерекшелігі - музыка. Олар бұл мерекені де, тіпті күнделікті өмірлерін де музыкамен әрлендіреді.

-   Біріккен Араб Әмірліктерінде Құрбан Айт мерекесі ерекше көлемде аталып өтіледі. Құрбандық шалынады. Мемлекеттік секторды дамыту министрлігінің шешімі бойынша, мереке күндері елдің барлық мемлекеттік және муниципалды мекемелері жабылады. Мысалы Дубайда 200 түрлі ұлт өкілі тұратындықтан, мұнда екі апта бойы Ид Әл-Адханың құндылықтарын және әдет-ғұрыптарын түсіндіретін, сондай-ақ бірлік идеясын көрсететін көптеген іс-шаралар өткізіледі. Бұдан бөлек Дубайдағы сауда орталықтарында бірнеше миллион дирхам мөлшеріндегі жүлделер мен лотереялар ойнатылады. Балаларға арналған көптеген ойын-сауық шаралары ұйымдастырылады.

-   Құрбан шалу діни мәдениеттің ең көне формасы болып табылады. Ол қазіргі діндер пайда болмай тұрып көп уақыт бұрын да пайда болған. Көне заманғы адамдардың түсінігі бойынша бұл салт табиғаттың рухы мен ата-бабаларының рухын тыныштандыру үшін жасалған.

-   Құран бойынша, Құрбан Айт өзінің бастауын Алланың Ибрахимге жіберген сынағынан кейін пайда болған. Пайғамбар 86 жасына дейін бала сүймеген көрінеді. Тек 86 жасқа келгенде ғана бірінші ұлы Исмаил дүниеге келеді. Бір күні Ибрахим түсінде Алланы көреді, ол оған жалғыз ұлын құрбандыққа шалуды өтінеді. Алланың өтінішіне қарсы келе алмаған Пайғамбар қазіргі Мекке қаласы тұрған жерге, яғни Мина өзенінің жағасына келіп, құрбандық дайындықтарын жасайды. Әкесі сияқты Аллаға берілген Исмаил әкесіне қарсы келмейді. Пайғамбар енді салтты жасай бергенде Алла оны тоқтатып, сен менің сынағымнан өттің, маған шын берілгендігіңді дәлелдедің дейді. Сөйтіп құрбандыққа шалуға қой береді. Содан бастап Құрбан Айтта құрбандыққа қой шалу дәстүрі басталыпты.

-   Құрбан сөзінің анықтамасы: Араб тілінде: Тілімізге еніп кеткен «құрбан» сөзі араб тілінде – «жақындау» деген мағынаны білдіреді. Терминдік мағынасы: Алла Тағаланың разылығына жақындау ниетімен құрбан айт күндерінде шалынатын арнайы малдың аты.  Құрбан шалудың артықшылығына, сауапты іс екендігіне қатысты пайғамбарымыздың бірнеше хадистері бар. 

-   Құрбан шалу кімге уәжіп? Құрбан шалу уәжіп болу үшін төмендегі мына шарттар болуы қажет. 1. Мұсылман болу; 2. Құрбан айт уақытында жолаушы болмау; 3. Негізгі қажеттерден тыс нисап мөлшеріндегі қаржыға ие болу. Нисап мөлшері – 85 грамм алтын яки құнына тең келетін ақша. Зекет ғибадаты сияқты құрбанның уәжіп болуы үшін нисап мөлшеріне жеткен малға бір жыл толу шарт емес.

Ақпарат дереккөзі: https://e-history.kz/kz/news/show/799/

Біздің мемлекетіміз, әлемнің басқа да көптеген елдері сияқты, сыбайлас жемқорлықтың алдын алу және болдырмау бойынша мақсатты жұмыс жүргізуде. Қазақстан-сыбайлас жемқорлыққа қарсы заңнаманы қабылдаған және осы мәселе бойынша халықаралық конвенцияларға қосылған ТМД мемлекеттерінің алғашқыларының бірі.

Сыбайлас жемқорлық - бұл, әдетте, қоғамның мүдделеріне, мемлекеттің ұлттық қауіпсіздігінің мүдделеріне қайшы келетін мемлекеттік функцияларды жеке мүдделерге пайдаланудан басқа ештеңе емес. Сыбайлас жемқорлық қоғамның салауатты даму жолында елеулі кедергі, араласуды және жоюды талап ететін әлеуметтік зұлымдық болып табылады. Бірақ бұл жағымсыз құбылыспен тиімді күрес оның мәнін, пайда болу шарттары мен салдарын толық және нақты білместен мүмкін емес. Қарапайым мағынада сыбайлас жемқорлық, ең алдымен, мемлекеттік қызметпен байланысты. Шынында да, мемлекеттік қызметшілер едәуір өкілеттіктерге ие және көбінесе бақылаусыз әрекет ете отырып, лауазымдық жағдайды өз мүдделеріне, демек, мемлекет мүдделеріне қайшы пайдалануға барлық мүмкіндіктерге ие. Мемлекеттік қызметшілер сыбайлас жемқорлық көріністеріне қарсы тұруға, сыбайлас жемқорлық құқық бұзушылықтарға не сыбайлас жемқорлықпен жымдасқан немесе сыбайлас жемқорлық үшін жағдай туғызатын әрекеттерге жол бермеуге тиіс.

Сонымен қатар, егер қоғамның өзі, әрбір азамат сыбайлас жемқорлыққа қарсы тұруға батылдық танытпаса, ал мемлекеттік басқару құзыретті және тиімді болмаса, сыбайлас жемқорлыққа қарсы күрес нәтижелі болмайды. Қазіргі уақытта сыбайлас жемқорлыққа қарсы күрес жүйелі сипатқа ие болды және санитарлық-эпидемиологиялық бақылау органдарының күнделікті қызметінің басым бағыттарының біріне айналды. Сыбайлас жемқорлықты жою мақсатында сыбайлас жемқорлық көріністерін жою бойынша бірқатар кешенді шаралар қабылданды. Мемлекеттік қызметшілердің жеке және заңды тұлғалармен байланыстарын барынша азайтуға бағытталған өз қызметінде біз мемлекеттік қызметшілердің сыбайлас жемқорлық көріністері үшін жағдайлар ғана емес, себептер де болмауына ұмтыламыз, осылайша рұқсат беру құжаттарын беру "Е-лицензиялау" ақпараттық жүйесі арқылы электрондық форматта жүзеге асырылады. Сыбайлас жемқорлық құқық бұзушылықтардың жолын кесу мақсатында "Жарқайың аудандық санитарлық-эпидемиологиялық бақылау басқармасы" АММ ғимаратында бейнебақылау камералары, сондай-ақ Басқарманың лауазымды тұлғаларының заңсыз әрекеттеріне азаматтардың өтініштері мен арыздары үшін жәшік орнатылды. Басқарманың мемлекеттік қызметшілері сыбайлас жемқорлық құқық бұзушылықтарды жасағаны үшін жауапкершілік туралы ресми ескертулерге қол қойды, лауазымдық нұсқаулықтарға сыбайлас жемқорлық құқық бұзушылықтарды жасағаны үшін жауапкершілік туралы тармақ енгізілді; "сенім телефоны" ұйымдастырылып, жұмыс істейді, ғимараттың фойесінде жеке және заңды тұлғалардың өтініштерін қабылдау үшін жәшіктер орнатылған, азаматтарды қабылдау кестесі бекітілген, қолжетімді орындарда стендтер орналастырылған.

Жариялылық және ашықтық қағидатын іске асыру мақсатында басқарма қызметкерлерімен сыбайлас жемқорлыққа қарсы заңнаманы зерделеу бойынша тұрақты сабақтар өткізілетін семинарлар, дөңгелек үстелдер тұрақты түрде өткізіліп тұрады.         

"Жарқайың аудандық санитарлық-эпидемиологиялық бақылау басқармасы" АММ басшысы, Ж.АХМЕТОВА.

Астана қалай құрылды

1991 жылы Қазақстан тәуелсіздігін алғаннан кейін, ел астанасын оңтүстіктен орталыққа қарай көшіру мәселесі көтерілді. Қазақстанның сол кездегі президенті Нұрсұлтан Назарбаевтың тапсырмасымен елдің жаңа астанасын орналастыруға оңтайлы қаланы анықтау мақсатында республиканың бүкіл аумағы мұқият зерттелді. Талдау қорытындылары барлық нұсқаның ішінен ең қолайлысы Ақмола қаласы екенін көрсетті. Бұл туралы Елбасы өзінің "Еуразия жүрегінде" атты кітабында былай деп еске алады.

"Ақмола Қазақстанның географиялық орталығы деуге болатын, Қазақстан экономикасының өрлеуінде жетекші де өскелең нүктелері болып отырған маңызды шаруашылық өңірлерге жақын орналасқан. Қала ірі көліктік арналардың қиылысында, тоғыз жолдың торабында тұр. Бұдан басқа, қала Қазақстан үшін көптеген шет елге шығудың мейлінше төте жолы – трансеуроазия арналарына таяу қоныстанған", - деп жазған еді Назарбаев.

Қазақстанның заманға лайық жаңа астанасын салу идеясы тұңғыш президент Нұрсұлтан Назарбаевқа тиесілі екені баршаға аян. Қазақстанның Жоғарғы кеңесі 1994 жылы 6 шілдеде Назарбаевтың ұсынысымен елорданы Алматыдан Ақмолаға ауыстыру туралы шешім қабылдайды. Араға үш жыл салып, 1997 жылы 20 қазанда Елбасы астананы ауыстыру туралы жарлыққа қол қояды. Осы құжатқа сай Ақмола Қазақстанның астанасы құқығын 1997 жылдың 10 желтоқсанынан бастап иеленді. Деректерге сүйенсек, елорданы ауыстыру туралы шешім қабылданған кезде, Астана (қазіргі Нұр-Сұлтан) халқының саны 290 мыңдай ғана болған екен.

Жаңа астананың ресми тұсаукесер тойы 1998 жылдың 10 маусымына белгіленді. Бұл күн 2006 жылға дейін астананың туған күні ретінде мерекеленіп келді.

Кейінірек парламент депутаттары заңға тиісті түзетулер енгізіліп, мемлекеттік мейрамның датасы 6 шілдеге ауыстырылды. Айта кетсек, Қазақстанның тұңғыш президенті Нұрсұлтан Назарбаевтың туған күні елорда күнімен тұспа-тұс келеді.

Астана атауы қанша рет өзгерді        

Алғаш қала 1832 жылы Есіл өзенінің жағасындағы Қараөткел шатқалында Ақмола бекінісі негізделгенде пайда болды. 1863 жылы Ақмола ресми түрде округтік қала ретінде жарияланып, 1960 жылы еліміздің солтүстік облыстары кіретін тың өлкесінің орталығы болды. 1961 жылға дейін ол Акмолинск, 1961 жылдан 1992 жылға дейін Целиноград, ал 1992 жылдан бастап 1998 жылға дейін Ақмола аталып келді.

1998 жылы 6 мамырда президент жарлығымен Ақмола қаласының атауы Астана болып өзгертілді. Сол жылдары елорда атауына қатысты түрлі ұсыныстар айтылған еді.

"Бір жолы түнде, дәлірек айтсам, сағат түнгі екіде Астана деген атау ойыма сап етіп, көкейіме қона кеткені. Астана дегеніміз астана! Қазақша әдемі естіледі. Қысқа да нұсқа, әуезді. Орысша да, ағылшынша да солай естіледі. Бұл атауда батылдық, мығымдық және айқындық реңк бар. Астана! Біздің жалпы көңіл ауанымызды және астананы көшіруден күтерімізді бейнелейтін өте ауқымды әрі қысқа ұран сияқты. Бірақ бұл атауды қазақша пайдаланудың жаңылтпаш сияқты өзіндік ерекшелігі болғалы тұр. Мысалы, астанамыз Астана! Бірақ, әлемдік тәжірибеде мұндай да мысалдар жетіп артылады. Мысалы, Бразилияның астанасы Бразилиа. Міне, осылай! Сөйтіп, түн ортасында келген ой – Қазақстан астанасының жаңа атауы Астана көкейге біржолата ұялады", - деп жазды Назарбаев "Еуразия жүрегінде" атты кітабында.

Дәл сол күні Астана қаласында Сарыарқа және Алматы аудандарын құру туралы жарлық шықты.

2019 жылдың көктемінде елорда атауы тағы өзгерді. Қазақстанның екінші президенті 2019 жылы 20 наурызда ұлықтау рәсімінде ел астанасын республиканың тұңғыш президентінің құрметіне Нұр-Сұлтан деп атауды ұсынды.

Тоқаевтың бұл ұсынысын парламент пен қалалық мәслихат депутаттары бірауыздан қолдады. Осылайша 23 наурызда мемлекет басшысы тиісті жарлыққа қол қойды.

Елорданың жаңа атауы – Нұр-Сұлтан дефис арқылы жазылатын болды. Қаланың атауы қазақ тілінен алынған, "нұрдың сұлтаны" деген мағына береді.

Астана күні қалай тойланады

Астана күні бүгінде жалпыхалықтық мейрамға айналды. Бұл мерекені еліміздің әр өңірі ерекше атап өтеді. Мерекелік концерттер, көрмелер, халықтық серуендер ұйымдастырылады. Бұған қоса, 6 шілде күні қазақстандықтарға бір күн демалыс беріледі. 

Нұр-Сұлтанда мейрам қарсаңында басталатын шаралар айдың соңына дейін жалғасады. Мереке күндері алыс-жақын өңірлерден қонақтар ағылады.

Бұл күндері түрлі концерттер, спорттық сайыстар, халықтық серуендер, фестивальдер өтеді, жас жұбайлар некесін қидырады.

Мереке соңы дәстүрлі отшашумен аяқталады.

Қазақстан Республикасы Әділет министрлігінің Құқықтық ақпараттық қызметі халыққа құқықтық ақпарат беру бойынша тәулік бойы (үзіліссіз және демалыссыз) тегін анықтамалық, консультациялық қызметтер көрсетуді, құқықтық мәселелер және мемлекеттік қызметтер көрсету бойынша консультация беруді, Қазақстан Республикасының қолданыстағы заңнамаларының ережелерін түсіндіруді жүзеге асырады, сондай-ақ мемлекеттік органдар туралы байланыс мәліметтерін Қазақстан Республикасы Әділет Министрлігінің құрылымдық бөлімшелері басшыларының деректерін ұсынады.

                      Консультативтік қызмет көрсету:

Қазақстан бойынша стационарлық телефон нөмірі: 119;

Нұр-Сұлтан қаласының тұрғындары үшін: 8(7172)58-00-58 (желі операторының тарифына сәйкес);

WhatsApp мессенджері арқылы (+7708-693-56-31);

«Әділет» Нормативтік құқықтық актілерінің ақпараттық-құқықтық жүйесінде «виртуалды кеңесші» виджетінің чат-бот модуляциясы арқылы;

Қазақстан Республикасы Әділет министрлігінің сайтындағы «Сұрақ-жауап» айдарлары арқылы жүзеге асырылады.

Ақмола облысы Әділет департаменті.

Домбыра − өзіндік музыкалық сипаты бар, қазақ өмірінде маңызды орын алатын аспап. Алғаш эпикалық дәстүр шеңберінде жыр, толғау, термелерді сүйемелдеуге қолданылған домбыра кейін аспаптық шығарма – күй жанрының қалыптасуына ықпал еткен. 6000 жылдық тарихы бар домбыра бүгінде жеке әнді сүйемелдеуге, күй тартуға, халықтық-фольклорлық музыкада, классикалық шығармаларды орындауға қолданылатын, мүмкіндігі кең музыкалық аспап. Ендеше назарларыңызға домбыраның шығу тарихы мен түрлері жайында кеңінен ақпарат ұсынамыз.

Өткен жүз жылдықта ұлы халық композиторы Құрманғазымен бірге Дәулеткерей, Тәттімбет, Сейтек, Байсерке, Қазанғап секілді саңлақ күйшілер дүйім жұртты аузына қаратқан. Бармағынан бал тамған майталман домбырашы болуымен бірге нелер бір ғажап күй де шығарған шын мәніндегі өнер иелері болды. Олардың арқасында домбырада тартылатын күйлердің музыкалық формасы үздіксіз жетілдіріле түсті. Домбыраның техникалық мүмкіндіктері артқан сайын домбыра тарту өнері де едәуір өрге басып, байи түсті.

Қазақстанның батыс аудандарында домбыра тартудың өзгелерге ұқсамайтын бөлек дәстүрі қалыптасқанын айту керек. Батыс аудандардағы домбыраның негізгі өзгешелігі, көлемі үлкен болып келеді, сонымен қатар шанағы сопақ, мойны жіңішке, перне саны көбірек. Сондықтан мұндай домбыраны тартқанда қолданылатын техникалық тәсілдерді шанағы жалпақ домбыраға қолдану қиын, өйткені бұл соңғы домбыраның мойны едәуір енді және ондағы перне де аз.

Шанағы жалпақ домбыраның бірнеше нұсқасы кең тараған. Егер батыс аудандардағы домбыраларға 12—14 перне тағылса, ал шанағы жалпақ домбыраға не бары 7—8 ғана перне байланған. Перне санын арттыру процесі өте баяу жүрді және оның өзі орындалатын репертуарға тікелей байланысты еді. Әдетте, жаңа перне онымен алғаш орындалатын күйдің атымен аталынды. Пернелердің бірі домбырада «Түрікпен күйін» орындағанда байланды да, «Түрікпен пернесі» деп аталды. Бейтарап терция интервалын беретін басқа бір перне Қазақстанның батыс аудандарында «Сарыарқа пернесі» деп аталады.

Ән, жыр айтуға арналған домбыраның пернелері 8 – 9, әрі кеткенде 14 – 15-ке жетсе, күй домбырасына 20-дан астам перне тағылады. Олардың құлақ бұрауы да қажетіне қарай (кварта, квинта) өзгертіледі. Домбыра, негізінен, екі ішекті және кейде үш ішекті болып келеді. Домбыра тартуда қағыстардың түрлері өте көп. Мысалы, «сермеп ойнау», «іліп қағу», «шертіп ойнау», т.б.

 Қазіргі кезде домбыраның 20-дан астам түрлері бар. Олардың ішінде:

• Ән мен күй домбырасы
• Торсық
• Тұмар
• Кең шанақты (екі нұсқасы)
• Балдырған
• Балашық
• Шіңкілдек
• Аша
• Үш ішекті
• Қуыс мойын
• Шертер

Оркестр домбыралары:

• Қоңыр дауысты (альт)
• Жіңішке дауысты (прима)
• Ащы дауысты (секунда)
• Бас домбыралар (екі нұсқасы)

 Домбыра құрылысы бірнеше бөліктен тұрады: басы, құлақтары, пернелер, мойын, шанақ, бетқақпақ, ілгек және ішектер. Сонымен қатар оның көптеген қосымша бөлшектері бар (тиек, кемер ағаш, тұжым ағаш, бастырма, ойық, қалқа, түйме, өрнек, желкелік). Домбыра тиегі үш түрлі болады (шайтан тиек, негізгі тиек, табалдырық тиек).

Домбыра дыбыс өткізгіштігі жоғары қарағай, дыбыс жаңғырту қасиеті бар тұт, қатты жынысты үйеңкі, емен секілді киелі ағаштардан, негізінен, екі түрлі әдіспен – құралып немесе ойылып (шауып) жасалады. Құрама домбыралардың шанағы жұқа тілшелерден құралып жасалса, бітеу домбыра тұтас ағаштан ойылады.

Домбыра – тек күй тартуға ғана емес, ән айтқанда сүйемел үшін де қолданылатын аспап. Біржан сал, Ақан сері, Жаяу Мұса, Мұхит, Мәди, Кенен, Әміре Қашаубаев, М.Ержанов, Ж.Елебеков, Ғ.Құрманғалиев, Қ.Байбосынов т.б. белгілі әншілер домбыраның әнге әр беріп, әншіге демеу болатынын дәлелдеді.

Домбыра аспабының дәстүрлі үлгілерін, халықтық дәстүрдегі перне байлау, домбыра баптау, күй ойнау, домбыра жасау жөнінде зерттеулерді Б. Сарыбаев, Б. Орымбеков, Т. Әсемқұлов, А. Сейдімбек, Д. Шоқпарұлы, т.б. еңбектерінен кездестіреміз.

Домбыра құрылымдық, сапалық дәрежесінің кемел деңгейге жетуі барысында бүгінге дейін бірнеше сатыдан өтті:

1932 – 1934 жылдары домбыра аспабын жетілдіру бағытында белгілі аспапшы шеберлер Қ.Қасымов, А.Ермеков, ағайынды И. және Б.Романенколар, Қ.Оңалбаев, т.б. еңбек етсе, оны 1960 – 1970 жылдары Ә.Аухадиев, О.Бейсенбекұлы жалғастырды.

1934 жылы Халық аспаптар оркестрінің (Қазақ мемлекеттік халық аспаптар оркестрі) құрылуымен байланысты домбыраның прима, альт, тенор, бас, контрабас сияқты түрлері дүниеге келді.

1990 – 2000 жылдары аспап жасаушы-қолөнерші шеберлердің республикалық «Үкілі домбыра» сайыстары өткізіліп, соның ықпалымен домбыра аспабы жаңаша зерттеу, даму, жетілу бағытына бет түзеді.

Ақпарат дереккөзі: https://massaget.kz/mangilik_el/shanyirak/salt-dastur/53033/

Туберкулез-адам ағзасына Кох таяқшаларының енуінен пайда болатын жұқпалы ауру. Ауру қауіпті, себебі ол тыныс алу жүйесіне әсер етеді. Сирек сүйек, тері, лимфа, жүйке, лимфа жүйесі, сондай-ақ басқа органдар мен жүйелер туберкулезге бейім.

Туберкулез түрлері: ашық және жабық түрі. Туберкулездің алғашқы белгілері: жөтел-туберкулез белгілерінің бірі. Ерте кезеңдерде ауру дерлік асимптоматикалық болып табылады. Ол дамыған сайын науқастың жағдайы нашарлайды, бірақ нақты белгілер байқалмайды. Шаршау, әлсіздік, айқын себептерсіз салмақтың күрт төмендеуі, температура 37-38 °c, ұзақ уақыт бойы төмендемейді, түнгі терлеу пайда болады. Балаларда ауру ересектерге қарағанда тезірек дамиды. Туберкулездің өкпе формасы жөтелмен бірге жүреді. Алдымен жеңіл, уақыт өте келе дами бастайды. Егер жөтел үш аптадан астам уақытқа созылса, дереу медициналық көмекке жүгіну керек. Жөтел бастапқыда құрғақ, әсіресе түнде және таңертең. Кейінірек сары-жасыл қақырық шыға бастайды.

Ересек жастағы туберкулездің алдын алу жыл сайын диспансерлік бақылау және ауруды ерте сатысында анықтау болып табылады. Туберкулезді ерте кезеңде анықтау мақсатында ересектер емханада жылына кемінде 1 рет флюорографиялық тексеруден өтуі қажет (мамандығына, денсаулық жағдайына және әртүрлі қауіп топтарына жататындығына байланысты). Бұл қауіпті аурудың алдын алу үшін дененің қарсылығын арттыру, салауатты өмір салтын ұстану керек, оған дұрыс тамақтану, жаман әдеттерден бас тарту, дене шынықтыру, спорт, денеңізді қатайту кіреді.

Жарқайың аудандық санитарлық-эпидимиологиялық бақылау басқармасы.

Ауа температурасының жоғарылауына байланысты, Жарқайың ауданының төтенше жағдайлар бөлімі сізді су айдындарында қауіпсіздік шараларын сақтамауы, сондай-ақ осы мақсатқа арналмаған жерлерде шомылуы қайғылы жағдайларға және адамдардың қаза болуына әкеп соқтыратыны туралы ескертеді.

Суға шомылу алдында шомылу орындарын дурыс тандап суға түсу ережелерін қатан түрде сақтаныз.

- Су айдындарында болғанда және демалғанда сақ болыңыз;

- дұрыс жазғы демалыс орынын тандау, суға шомылуға жарамсыз жерлерден, тиым жасалған жерлерден абай болыңыз (қатты ағыс, терен жерлер, су асты мүк өскен)

- суға түсу уақытында алкогольді ішімдіктерді ішпеңіз;

- кішкентай баларды қараусыз қалдырманыз;

Абай болыңыздар! Сіздердін демалысыныз Сіздердін жақындарыңызға қайғылы жағдай алып келмесін.

Жарқайың ауданының Төтенше жағдайлар бөлімі.

Халықты қорғаудың басты шараларының бірі-қандай да бір қауіп немесе аппатар туындау қаупі туралы ақпараттандыру және хабардар ету болып табылады. Қауіп туралы уақытында хабардар ету және осы жағдайға сәйкес әрекет ету туралы халықты хабардар ету.

Халықты хабардар ету бірыңғай ескерту дабылы «НАЗАР АУДАРЫҢЫЗДАР!» болып табылады

Егер ұзақ дабыл естісеңіздер бұл «НАЗАР АУДАРЫҢЫЗДАР!» ескерту дабылы екенін білуіңіз қажет. Ары қарай хабарлама:

«НАЗАР АУДАРЫҢЫЗДАР!» ескерту дабылын естіген жағдайда:

Егер дабыл кезінде үйде болсаңыз:

1. Жергілікті радио және теледидар арналарын қосу;
2. Болып жатқан жағдай туралы шұғыл ақпаратты мұқият тыңдау және соған орай әрекет ету;
3. Дулей зілзала немесе апаттарды жою кезінде осы барлық ақпарат құралдарын қосып қою.

Егер дабыл кезінде далада болсаңыз:

1. Даладық дабылдағыштар және жылжымалы хабарландыру құралдарынан беріп жатқан шұғыл ақпаратты мұқият тыңдау немесе оқу;
2. Адам көп жиналатын жерлердегі плазмалық панельдерде орналасқан және далалаық жарықдиодты экрандардағы ақпаратты оқу;
3. Хабарламаға сәйкес әрекет ету.

Сондай-ақ халықты хабардар ету жіберілген СМС хабарламалар арқылы,өнірлік ұялы байланыс операторлары арқылы жузеге асырыпады. Құрметті аудан тұрғындары және келген қонақтар! Осы аймақтағы жоспарланған іс-шараларға сәйкес айдың әрбір екінші сейсенбісінде барлық командалар шығарылған ескерту жүйесіндегі (дыбыстық сигналдар электр сиренасы) тексерулер жүргізіледі. Осыған байланысты, аталған сигналдарды естігенде, қобалжымауларынызды сұраймыз.

Жарқайың ауданының Төтенше жағдайлар бөлімі.