Қазақстан жаңа конституциялық кезеңге қадам басты

Астанада Қазақстанның саяси дамуындағы маңызды тарихи оқиғалардың бірі – Президент Қасым-Жомарт Тоқаевтың қатысуымен Сенат пен Мәжілістің соңғы бірлескен отырысы өтті. Бұл жиын Тәуелсіз Қазақстанның қос палаталы Парламентінің қызметін қорытындылап, мемлекеттік басқарудың жаңа конституциялық үлгісіне өтудің бастауы ретінде тарихқа енді.

Президент өз сөзінде бұл отырыстың ел үшін айрықша тарихи мәнге ие екенін атап өтті. Оның айтуынша, Парламенттің кезекті сессиясының аяқталуы ғана емес, Қазақстанның заң шығарушы жүйесінің жаңа кезеңге өтуі жүзеге асуда. Мемлекет басшысы 1 шілдеден бастап жаңа Конституция заңды күшіне еніп, мемлекеттік билік жүйесі түбегейлі жаңаратынын мәлімдеді.

Қасым-Жомарт Тоқаев жаңа Конституцияның қабылдануы мемлекеттік басқару жүйесіндегі кезекті әкімшілік өзгеріс емес, еліміздің дамуындағы жаңа тарихи кезеңнің бастауы екенін айтты. Оның пікірінше, бұл реформалардың басты мақсаты – мемлекеттің басқару тетіктерін жетілдіру, қоғамдық институттардың тиімділігін арттыру және азаматтардың мемлекеттік шешімдер қабылдау үдерісіне қатысу мүмкіндігін кеңейту.

Жаңа конституциялық модельге сәйкес, Қазақстандағы екі палаталы Парламенттің орнына Құрылтай жұмыс істейтін болады. Президенттің айтуынша, Құрылтай қоғам мен мемлекет арасындағы ашық диалогтың тиімді алаңына айналып, халықтың ұсыныстары мен сұраныстарына жедел ден қоюға мүмкіндік береді. Сонымен қатар заң жобаларын әзірлеу кезінде цифрлық технологиялар кеңінен қолданылып, заң шығару үдерісінің ашықтығы мен қолжетімділігі артады.

Мемлекет басшысы мемлекеттік басқару жүйесін жаңғырту ел тәуелсіздігін нығайтуға және ұлттық мүддені қорғауға бағытталғанын ерекше атап өтті. Оның айтуынша, Қазақстанның егемендігі мен қауіпсіздігін қамтамасыз ету әрдайым басты басымдық болып қала береді. Осыған байланысты қоғамның барлық өкілдері – мемлекеттік қызметкерлер, ғалымдар, сарапшылар, үкіметтік емес ұйымдар мен халықаралық институттар бірлесіп жұмыс істеуі қажет.

Президент сондай-ақ өткен жылғы Жолдауында Қазақстанды үш жыл ішінде дамыған цифрлық мемлекетке айналдыру жөнінде міндет қойғанын еске салды. Бұл мақсатқа жету мемлекеттік басқарудың тиімділігіне, заманауи технологияларды енгізуге және азаматтарға көрсетілетін қызметтердің сапасын арттыруға тікелей байланысты екені айтылды.

Жиында жаңа конституциялық орган – Халық кеңесін құру туралы да жарияланды. Оның құрамына мәслихат депутаттары, қоғамдық кеңестердің мүшелері, сарапшылар қауымдастығы мен азаматтық қоғам институттарының өкілдері енеді. Бұл орган заң шығару бастамасы құқығына ие болып, қоғамдық пікірді қалыптастыру мен маңызды мемлекеттік шешімдерді талқылауда ерекше рөл атқарады.

Мемлекет басшысы өз сөзінде Қазақстан Парламентінің тәуелсіздік жылдарындағы қызметіне де тоқталды. Оның айтуынша, соңғы отыз жылдан астам уақытта елімізде үш жарым мыңға жуық заң қабылданған. Олардың әрбір оныншысы депутаттардың бастамасымен әзірленіп, мемлекеттік басқару жүйесін, экономиканы және әлеуметтік саланы дамытуға бағытталды.

Президент Парламенттің барлық шақырылымдары елдің құқықтық негізін қалыптастыруға, нарықтық экономиканы дамытуға және демократиялық институттарды нығайтуға елеулі үлес қосқанын атап өтті. Сондай-ақ заң шығарушы органда қызмет еткен мемлекет және қоғам қайраткерлерінің еңбегі Қазақстан тарихында ерекше орын алатынын айтты.

Қасым-Жомарт Тоқаевтың пікірінше, Қазақстан жаңа конституциялық кезеңге нық қадам басып отыр. Алдағы реформалардың негізгі мақсаты – мемлекеттік басқарудың тиімділігін арттыру, азаматтардың әл-ауқатын жақсарту, қоғамдық тұрақтылықты сақтау және елдің тәуелсіздігі мен егемендігін одан әрі нығайту. Осылайша, жаңа Конституция елдің саяси жүйесін жаңғыртуға және Қазақстанның ұзақ мерзімді дамуына негіз болатын маңызды құжат ретінде бағалануда.

«Жарқайың тынысы» газетінің редакторы.