Р. Қошқарбаевтың жиені Жарқайын тарихи- өлкетану музейінде болды
Жарқайын тарихи- өлкетану музейіне Рақымжан Қошқарбаевтың жиені Сатанова Рысты апай немерелерімен келіп, Р. Қошқарбаев туралы анасынан естіген әңгімесін айтып беріп, кездесу барысында Р.Қошқарбаев туралы кітапті музейге сыйлады- дейді тарихи өлкетану мұражайының директоры.
Рақымжан Қошқарбаев 1945 жылдың 30 сәуірінде жауынгер Григорий Булатовпен бірге Рейхстагқа Кеңес одағының туын тіккен болатын. Ол осы ерлігі арқылы сұрапыл соғысқа нүкте қойды...
Рақымжан Қошқарбаев 1924 жылы 19 қазанда Ақмола облысының Тайтөбе ауылында дүниеге келген. Әскер қатарына 1942 жылы алынып, 1944 жылы Фрунзедегі жаяу әскер училищесін бітірді. Майдан даласына да осы жылы аттанған.
Рақымжан Қошқарбаев пен Григорий Булатов Рейхстагқа дейінгі 300 метр қашықтықты 7,5 сағат жүріп өткен. Межеге жеткен кезде Григорий Рақымжанды иығына салып көтеріпті, ту барынша жоғары желбіресін деп. Бұл оқиғаны тіпті американдық «Нью-Йорк таймс» газеті де жазған.
1945 жылдың 1 мамырындағы санында басылым Гитлер режимінің құлағандығын және Рейхстагқа лейтенант Рақымжан Қошқарбаев пен жауынгер Григорий Булатовтың ту тіккендігін айтады.
Қошқарбаевтың ерлігі ақыры мойындалды. Тек араға алпыс жылдан астам уақыт салып. Өкініштісі, батырдың көзі тірісінде КСРО тарапынан оған лайықты құрметтің көрсетілмеуі ғана.
Рақымжан Қошқарбаев 1988 жылдың 10 тамызында дүниеден өтті. Араға он бір жыл салып, 1999 жылы оған Қазақстанның Халық Қаһарманы атағы берілді.
Жарқайың аудандық тарихи - өлкетану мұражайы.
