ТІЛІ МЫҚТЫНЫҢ – ЕЛІ МЫҚТЫ
Қазіргі уақытқа дейін қазақ халқы тілдесу қажеттілігін өтеп келумен қатар оның рухани байлығы – ауыз әдебиетін атадан балаға мұра етіп ауызша жеткізген. Мұны халқымыздың аса мол мақал-мәтелдерінен, жұмбақтары мен жаңылтпаштарынан көруге болады.
Егеменді ел болғанымызға міне, отыз бір жылдың жүзі болды. Елбасымыздың салиқалы саясатының негізінде қазақ елі өркендеп, дамып келеді. Осы уақытқа дейін мемлекеттік тіліміздің әжептәуір дәрежесі көтерілді –ау, бірақ-та әлі біз ойлаған межелі деңгейге жете қойған жоқ. Ия елімізде қазақ тілін үйренуге басқа да ұлт өкілдері құштарлық танытып жатыр. Басқа ұлт өкілі мемлекеттік тілді біліп жатса, қуанышымызда шек жоқ. Осы тұрғыда қазақ тілінің мәртебесі көтеріле берсе екен дейміз. Алайда, ана тілін білмейтін қандастарымыз қазақ тілін мойындамай, әлі де жоғарыға қарап жалтақтап жүргені жаныңа батады. Мемлекетіміздің іргетасы жылдан-жылға нығайып келеді. Тәуелсіздігіміздің әрі қарай бекініп дами түсудің бірден-бір жолы – мемлекеттік тілді бағалау, оны құрметтеу, қазақ тілінің аясын кеңейту емес пе?! Біздің болашағымыз, Қазақстанның болашағы – жастар, яғни жастарымыз ана тілін еркін меңгеруі тиіс. «Өзге тілдің бәрін біл, өз тіліңді құрметте», - дегендей, алдымен өзінің ана тілін жетік білген адам басқа шетел тілдерін де оңай оқып-үйрене алады. Сондықтан, өнеге отбасыдан басталады, әрбір ата-ана баласын ана тілінде тәрбиелесе оның болашағы зор екеніне сенімдімін. Биыл Ата Заңымыз – Қазақстан Республикасы Конституциясының қабылданғанына 27 жыл, Ата Заң – Қазақстан Тәуелсіздігінің тірегі. Түп-қазығымыз Ата Заңымызды арқау ете отырып, Тәуелсіздігімізді тұғырлы ету, тарихымызды дәріптеу, тілімізді құрметтеу әр қазақстандықтардың міндеті. Ендеше, Тәуелсіздік елімізде Қазақстан халқының жүзі әрдайым ашық-жарқын болып, ертеңімізге сеніммен қарау және асу-асу белестерді бағындырып талай жетістіктерге жету үшін тілімізді, ұлтымызды, отанымызды қадірлейік!
Жарқайың ауданының ПБ ІжСКТ.
