Президент Жолдауы – әке тәрбиесі мен отбасы құндылықтарын нығайтудың маңызды бағдары
Президент Жолдауы – әке тәрбиесі мен отбасы құндылықтарын нығайтудың маңызды бағдары
Мемлекет басшысының Жолдауы – еліміздің алдағы даму бағыттарын айқындайтын маңызды құжат. Онда көтерілген міндеттер қоғамның тұрақты дамуына, азаматтардың әл-ауқатын арттыруға және өскелең ұрпақтың болашағына бағытталған.
Жарқайың ауданының Әкелер кеңесінің төрағасы ретінде Жолдауда айтылған бастамалардың ішінде отбасы институтын нығайту, жас ұрпаққа сапалы тәрбие беру, ұлттық құндылықтарды сақтау мәселелеріне ерекше мән беремін.
Бүгінгі қоғамда әкенің отбасындағы орны ерекше. Әке – отбасының тірегі, баланың бойына жауапкершілік, адалдық, еңбекқорлық пен отансүйгіштік қасиеттерді қалыптастыратын тұлға. Сондықтан бала тәрбиесі тек ананың міндеті емес, әке мен ананың ортақ жауапкершілігі болуы тиіс.
Осы бағытта Әкелер кеңесінің жұмысы да маңызды рөл атқарады. Біз жастар арасында отбасылық құндылықтарды насихаттау, әкелердің бала тәрбиесіндегі жауапкершілігін арттыру, жасөспірімдерге дұрыс бағыт-бағдар беру жұмыстарын одан әрі жалғастыруымыз қажет.
Сонымен қатар, ауылдық жерлердің дамуы, еңбек адамын қолдау, жастарға мүмкіндік жасау және әлеуметтік жағдайды жақсарту – ауданымыз үшін де өзекті міндеттер. Әрбір отбасының әл-ауқаты артып, ауылдарымыз көркейген кезде ғана қоғамның тұрақты дамуына қол жеткіземіз.
Мемлекет басшысы айқындаған міндеттерді жүзеге асыруға әрбір азамат өз үлесін қосуы керек. Өйткені елдің болашағы – тәрбиелі ұрпақта, ал тәрбиелі ұрпақтың қалыптасуы ең алдымен отбасынан басталады.
Біздің басты мақсатымыз – елін сүйетін, үлкенді құрметтейтін, кішіге қамқор болатын, жауапкершілігі жоғары ұрпақ тәрбиелеу. Бұл – баршамызға ортақ міндет.
Мнафов Исраил - әкелер кеңесінің төрағасы