Табыстылыққа бағытталған қадам: Ерейментау аграршылары мал азығы мен майлы дақылдар алқабын ұлғайтты
Ерейментау ауданы биылғы көктемгі егіс науқанын табысты аяқтады. Егіс жұмыстарының қорытындылары мен өңірдегі егіс құрылымындағы өзгерістер туралы брифинг барысында Ерейментау ауданының әкімі Нұрлан Мұқатов баяндады.
Биыл аудан бойынша жалпы жыртылған жер көлемі 111 мың гектарды құрап, өткен жылмен салыстырғанда шамамен 4 мың гектарға артты. Дәстүрлі дәнді және дәнді-бұршақты дақылдар 80 мың гектарға жуық алқапқа егілді. Сонымен қатар жергілікті шаруалар ауыспалы егісті әртараптандыру жұмыстарын жүйелі түрде жүргізіп, сұранысқа ие майлы және мал азықтық дақылдарға басымдық беруде.
Атап айтқанда, майлы дақылдардың егіс көлемі 17 мың гектарға дейін ұлғайды. Сондай-ақ мал азықтық дақылдар алқабы да айтарлықтай өсіп, 13 мың гектарға жетті. Бұл өз кезегінде мал шаруашылығының жем-шөп базасын нығайтып, өңірдегі ет кластерін дамытуға тікелей ықпал етеді.
Мұндай ауқымды науқанды агротехникалық мерзімдерге сай өткізуге шаруашылықтардың техникалық жарақтандырылуы мүмкіндік берді. Егіс алқаптарында 400-ден астам трактор, заманауи егіс кешендері және жүздеген ауыл шаруашылығы техникасы жұмылдырылды. Аграршылар тұқым сапасына ерекше көңіл бөліп, бірінші және екінші репродукциялы тұқымдарды, сондай-ақ жергілікті климаттық жағдайларға бейімделген элиталық сұрыптарды пайдаланды.
«Ауданның агроөнеркәсіптік кешені жер ресурстарын тиімді пайдалануға негізделген ұтымды саясат жүргізіп келеді. Егіс алқаптарын сауатты әртараптандыру және техникалық паркті жаңарту шаруашылықтарға азық-түлік қауіпсіздігін қамтамасыз етіп қана қоймай, нарық талаптарына бейімделе отырып, экономикалық тұрақтылығын арттыруға мүмкіндік береді», – деді Нұрлан Мұқатов.
Үйлесімді жұмыстың және агротехнологияларды сақтаудың нәтижесінде ауыл шаруашылығының жалпы өнім көлемінің нақты индексі тұрақты өсім көрсетіп отыр. Осылайша, Ерейментау ауданы Ақмола облысының жетекші аграрлық орталықтарының бірі ретіндегі мәртебесін тағы бір мәрте дәлелдеп, өңірдің агроөнеркәсіптік кешенінің тұрақты дамуына өз үлесін қосуда.
