Қосшы қаласындағы референдумға жеке өзі қатысуға келді 97 жастағы ҰОС ардагері
Еліміздің Конституциясына өзгерістер мен толықтырулар енгізу бойынша референдумға арналған 718 сайлау учаскесі Ақмола облысында тіркелген. Сағат 16: 00-де ақмолалықтардың 65,1% дауыс берді, деп хабарлайды "ҚазАқпарат"ХАА тілшісі.
Облыстық сайлау комиссиясының төрағасы Манарбек Садуовтың айтуынша, ақмолалықтар референдумға барғысы келеді.
"Дауыс беру жақсы жүріп жатыр. Бізде 718 референдум учаскесі және 507447 дауыс беруші тіркелген. 16: 00-де 330 мың 415 адам дауыс берді, бұл 65,1 %. Сағат 18: 00 - де келу 69,07% - ды құрады", - деп түсіндірді М.Садуов.
Сайлау учаскелері өз жұмысын 7:00-ден бастады. Өз дауысын бірінші болып беруге келгендерді, сондай-ақ сайлауға алғаш қатысқан 18 жастағы ақмолалықтарды естелік сыйлықтар күтіп тұрды. Ардагерлер де назардан тыс қалған жоқ.
Мысалы, Қосшы қаласындағы № 745 сайлау учаскесіне Ұлы Отан соғысының 97 жастағы ардагері Нұрғасым Ажитаев келді. Ал ең қарт дауыс беруші Ерейментау ауданы Еңбек ауылының 102 жастағы тұрғыны Дидар Дайкен болды, ол өз үйінде дауыс берді.
"23 учаске дауыс беруді аяқтады. Бұл тергеу изоляторы, әскери бөлімдер, ауруханалар, санаторийлер сияқты жабық учаскелер. Дауыс беру 20:00-ге дейін жалғасады, содан кейін қорытындылаймыз. Учаскелерде халықаралық бақылаушылар, сондай - ақ қоғамдық бірлестіктер, кәсіподақтар, партиялар және т.б. өкілдері қатарынан бақылаушылар бар", - деп толықтырды М. Садуов.
Ақмола облысының әкімі Ермек Маржықпаев өзінің № 8 сайлау учаскесінде дауыс берді.
"Мен, мыңдаған ақмолалықтар мен миллиондаған қазақстандықтар сияқты, бізге ҚР Конституциясымен берілген Өз құқығымды пайдаландым. Біздің облыстың барлық сайлау учаскелері бүгін осы іс-шараны өткізу үшін дайын болды. Ақмолалықтардың белсенділігі жоғары, көңіл-күйі мерекелік, бұл біздің еліміздің тағдыры жерлестерге бей-жай қарамайтындығын білдіреді", - деді аймақ басшысы.
